नेपाल कलाकार संघमा नेतृत्वको दौड: खड्का, केसी र श्रेष्ठ चुनावी मैदानमा
काठमाडौँ । नेपाल कलाकार संघको आगामी नेतृत्वका लागि तीन जना आकांक्षीले तयारी तीव्र बनाएका छन्। संघको अध्यक्ष पदका लागि विन्द्र खड्का, उत्तम केसी र सबिन श्रेष्ठ प्रमुख दाबेदारका रूपमा देखिएका छन्।
यसअघि संघका वर्तमान अध्यक्ष मोहन निरौलाको नाम पनि आगामी नेतृत्वका लागि चर्चामा थियो। तर पछिल्लो समय उनी तत्काल उम्मेदवारी घोषणा गर्ने मनस्थितिमा नरहेको र ‘पर्ख र हेर’ रणनीतिमा रहेको बुझिएको छ। यसले गर्दा अध्यक्ष पदको प्रतिस्पर्धा हालका लागि तीन आकांक्षीबीच केन्द्रित भएको देखिन्छ।
आकांक्षीहरू आफ्नो अनुभव, संघलाई अघि बढाउने योजना तथा कलाकारहरूको हितका विषयलाई मुख्य एजेन्डा बनाउँदै समर्थन जुटाउने प्रयासमा छन्।
कलाकारहरूको पेशागत हक–हित, चलचित्र क्षेत्रको विकास, कलाकारहरूको सामाजिक सुरक्षा र संघको संस्थागत सुदृढीकरणजस्ता मुद्दालाई प्राथमिकतामा राखेर उनीहरूले आन्तरिक छलफललाई तीव्र बनाएका छन्।
संघको नेतृत्वका लागि हुने निर्वाचन नजिकिँदै जाँदा कलाकार वृत्तमा चुनावी माहोल पनि क्रमशः तातिँदै गएको छ। विभिन्न कलाकार समूहहरूबीच सम्भावित सहकार्य, प्यानल निर्माण र समर्थनको गणितबारे छलफल सुरु भएको बताइन्छ।
नेपाल कलाकार संघ चलचित्र तथा अभिनय क्षेत्रसँग सम्बन्धित कलाकारहरूको साझा संस्था भएकाले यसको नेतृत्व कसको हातमा पुग्ने भन्ने विषयलाई कलाकार समुदायले चासोका साथ हेरिरहेका छन्। आगामी निर्वाचनले संघको आगामी कार्यदिशा र नेतृत्वको शैली कस्तो हुने भन्ने निर्धारण गर्ने अपेक्षा गरिएको छ।
